Ek weet nie of dit by julle ook so mal gaan die tyd van die jaar nie. Mens los mos alles tot jy skielik een middag voor die tv gaan sit, en jy sien 'n Kersfees-advertensie! Dan skrik jy jou vrek en besef dis al 11 Desember, en nog NIKS is gedoen nie. Ons het op die nippertjie besluit om bietjie Kaap toe te gaan, so ek moes vinnig vlugte bespreek, kar bespreek, verblyf soek en net toe ek dink alles is klaar gereel, toe onthou ek ons het 'n 5maande oue baba. SO, 'n kot, stootkarretjie, karstoeltjie en 'n VRAG doeke, klere, bottels en melk moet saam. Dan praat ek nie eers van sy speelgoed wat hy so mal oor is....
Deur die gejaag, onthou ek ek moet nog die doop ook reel....Maar dis 'n storie vir 'n ander keer. My ousie word siek, ek stuur haar om by die huis gesond te gaan word. Ek wil nie met 'n siek gesin by die see sit! En so moet ek klere was (ek het laas 'n wasmasjien gebruik in 2002). So gaan staan ek voor die masjien en wonder waar die "manual" is....Ons het in Julie getrek en sekere goed het in daai bokse gebly, die "manual" ingesluit! Ek moes toe maar my ousie bel om te hoor hoe werk die ding. Na die 4e bondel klere toe besluit ek ek gaan eerder die kombuis aanpak! Vanoggend (2 oggende later) is daar 'n klop aan die deur. Dis my ousie. Felicity, as ek nie my plek geken het nie, het ek jou om die hals geval en jou gesoen. SO bly was ek om jou te sien. (Ek kan al my bure hoor as hulle sien ek soen my ousie.....)
Smarty 2 is klaar met vakansie en ons gaan more op vakansie. Ons wil julle 'n baie GESEENDE KERSFEES toewens en dat julle sal onthou waaroor die tyd van die jaar eintlik gaan. Dat ons dankie sal se vir al die seen wat ons die afgelope jaar ontvang het. Julle moet julle vakansie geniet, en kom veilig terug! Vir die wat werk, julle beurt vir vakansie is om die draai! Mag 2011 vir julle 'n geseende en voorspoedige jaar wees, 'n jaar vol geluk, liefde en gesondheid (en dalk 'n paar rand ekstra in die bank om 'n handsak of skoene te shop)
No comments:
Post a Comment